११ चैत २०१५, काठमाडौं–संविधानसभा अध्यक्ष सुवासचन्द्र नेम्वाङले चैत १५ गते पाँच बजेसम्म सहमति कायम गर्न समयसिमा तोकेका छन्। बुधबार प्रमुख दलका प्रमुख सचेतकलाई आफ्नो कार्यकक्षमा बोलाएर अध्यक्ष नेम्वाङले सहमतिको नाममा लामोसमय सम्म संविधानसभा स्थगित गर्न नमिल्ने भन्दै चैत १५ गते साँझ पाँचबजेसम्म सहमति गर्ने समयसिमा तोकेको एमाओवादीका प्रमुख सचेतक गिरिराजमणि पोखरेलले जानकारी दिए। अब सहमतिको नाममा धेरै दिन संविधानसभाको बैठक स्थगित गर्न सकिँदैन,'

नेम्वाङको भनाइ उद्धत गर्दै पोखरेलले भने,’ तपाइहरु शीर्ष नेताहरुसँग पनि छलफल गर्नुस। १५ गतेभित्र सहमति गर्नुस। त्यो भित्र पनि सहमति गर्न सक्नुभएन भने म संविधानसभाको बैठक बोलाउँछु।’सभाध्यक्ष नेम्वाङले नेपाली कांग्रेस, नेकपा एमाले, एकीकृत माओवादी, मधेसी दलायत आठ राजनीतिक दलका प्रमुख सचेतकसँग छलफल गरेका थिए।

अध्यक्ष नेम्वाङले एकसाता अघि संविधानका अर्न्तवस्तुमा सहमति या प्रक्रियामा जाने विषयमा टुंगो लगाउन आजसम्मको समयसिमा तोकिदिएका थिए। तर नेम्वाङले तोकेको समयसिमाभित्र संविधानका विवादित अर्न्तवस्तु र प्रक्रिया कुनैमा पनि सहमति नभएपछि आगमी प्रक्रियाका बारेमा छलफल गर्न प्रमुख सचेतकसँग छलफल गरेका हुन्।