जिल्ला अदालतले वसन्तपुर एसिड काण्डका अभियुक्त जीवन विकलाई पुर्पक्षसम्म थुनामा राख्न आदेश गरेको छ । न्यायाधीश स्वीकृति पराजुलीको बिहीबार बसेको एकल इजलासले प्रमाण बुझ्दै जाँदापछि ठहरेबमोजिम हुने गरी मुद्दाको टुंगो नलागुञ्जेल हाल थुनामै राख्ने आदेश गरेको हो । मुद्दाको पहिलो सुनुवाइमा अभियुक्तलाई थुनामा राखेर मुद्दाको टुंगो लगाउने

कि छाड्ने भन्नेमा अदालतले दिने आदेशलाई पुर्पक्षको आदेश भनिन्छ । तीन वर्षभन्दा बढी जेल सजाय हुने कसूरका अभियुक्तलाई तत्काल प्राप्त सबुद र प्रमाणका आधारमा थुन्नुपर्ने देखिए अदालतले पुर्पक्षका लागि यसरी जेल चलान गर्ने कानुनी व्यवस्था छ ।

गत फागुन १० गते जीवनले वसन्तपुरकी संगीता थापामगर र सीमा बस्नेतमाथि ट्युसन पढिरहेकै बेला एसिड प्रहार गरेका थिए । चैत ६ गते पक्राउ परेपछि पत्रकार सम्मेलनमा जीवनले घटना आफूबाटै भएको स्वीकारेका थिए । उनका अनुसार संगीताले आफू दलित हो भन्ने थाहा पाएपछि प्रेम सम्बन्ध तोडिदिएकाले बदला लिन एसिड प्रहार गरेका हुन् ।

पीडित किशोरीको परिवारले भने जीवनले दाबी गरेजस्तो कुनै प्रेम सम्बन्ध नभएको बताएको छ । उनीहरू दुवैका परिवार एउटै घरमा भाडामा बस्दै आएका थिए ।