२ अगष्ट २०१५, काठमाडौं- विश्व क्रिकेट लिग च्याम्पियनसिपमा स्कटल्यान्डले दुई दिन लगाएर नेपालमाथि लगातार दोस्रो विजय नतिजा निकालेको छ। वर्षाले थुप्रै पटक बिथोलेको खेलमा घरेलु टोली स्कटल्यान्डले नेपालमाथि शनिबार ९ विकेटको रवाफिलो जित हासिल गर्यो।

अघिल्लो दिन नेपालको इनिङ सकिएपछि स्कटल्यान्डको ऐरस्थित

क्याम्बुसडनमा लामो समयसम्म दोस्रो इनिङ सुरु हुन सकेन। वर्षाले धेरै समय बिथोलेपछि नेपालले बनाएको १ सय ६७ रनको जवाफमा डकवर्थ लुइस पद्धतिअनुसार स्कटल्यान्डलाई २२ ओभरमा १ सय १० रनको लक्ष्य दिइएको थियो। तर, वर्षाले पुनः खेल अवरुद्ध पार्दा स्कटल्यान्डले १० बलभन्दा बढी खेल्न पाएन। १० बलमा टोलीले बिनाक्षति १५ रन जोडेको थियो।
१५–० को स्थितिबाट शनिबार खेल सुरु गर्दा स्कटल्यान्डलाई २०.२ ओभरमा ओभरमा जितका लागि ९० रन आवश्यक थियो। जसलाई टोलीले १३.५ ओभरमै १ विकेट गुमाएर पूरा गर्योा। ४९ बल बाँकी रहँदै स्कटल्यान्डलाई नेपालमाथि एकदिवसीय क्रिकेटमा लगातार तेस्रो जित दिलाउने क्रममा म्याथ्यु क्रसले अर्धशतकीय इनिङ खेले भने ओपनर जर्ज मुन्सेले ४० रनको योगदान गरे।
क्रसले अविजित ५१ रन बनाउँदा ३७ बल सामना गर्दै ४ चौका र २ छक्का प्रहार गरेका थिए। मुन्सेले ४१ बलमा ५ चौका र २ छक्का प्रहार गरे। स्कटल्यान्डका अर्का ओपनर काइल कोइट्जर ७ रन बनाएका बेला सोमपाल कामीको बलमा बोल्ड भए।
स्कटल्यान्डसँग नेपालले खेलेको यो तेस्रो ५० ओभरको खेल हो। बुधबार सोही मैदानमा स्कटल्यान्डसँग खेल्दै विश्व क्रिकेट लिग च्याम्पियनसिपमा डेब्यु गर्दा नेपाल ३ रनले पराजित भएको थियो। त्यसअघि एकपल्टमात्र दुई टोली आमने–सामने भएका थिए। गत वर्ष न्युजिल्यान्डमा एकदिवसीय विश्वकप छनोटमा भेट हुँदा स्कटल्यान्डले नेपालमाथि ९० रनको प्रभावशाली जित दर्ता गराएको थियो।
ट्वान्टी–२० विश्वकपमा लगातार दोस्रोपल्ट छनोट भई भूकम्पको पीडामा मलम लगाउने लक्ष्य आयरल्यान्डमा चकनाचुर भइसकेपछि नेपाल विश्व क्रिकेट लिग खेल्न स्कटल्यान्ड पुगेको थियो।