अष्ट्रेलियन नेपालीले फेरे विमानस्थलको मुहार, निरन्तरतामा शंका

२१ जुलाई २०१७, काठमाण्डौं- नेपालको एकमात्र अन्तराष्ट्रिय त्रिभुवन अन्तराष्ट्रिय विमानस्थल  केहीदिनयता नेपाली सञ्चार जगतमा छएको छ, सरसफाइका कारणले । गैर आवाशीय नेपाली संघ अन्तरगत सिड्नीमा ८ बर्षदेखी क्लिनिङ व्यवसाय संचालन गरिरहेका ३२ बर्षिय खेम शर्माको नेतृत्वमा विमास्थलको सरसफाइ हुन थालेपछि नेपाली विमास्थालको स्वरुप फेरीएको हो । केही हप्तायता नेपाल विमानस्थल ओर्लने नेपाली यात्रुहरु विमानस्थलको सरसफाइका कारण शानले टाउको ठड्याउन थालेका छन । नेपालका मुखपत्रहरु देखी हरेक अनलाईनहरुमा यस खबरले ठाँउ पाएका छन ।

राष्ट्रिय दैनिक कान्तिपुरमा एकराज पाठक लेख्छन- असार २८ गते त्रिभुवन अन्तर्राष्ट्रिय विमानस्थलमा उत्रिएका सुविन साह झुक्किए । उनलाई आफू नेपालमै आइपुगेँ कि कतै ट्रान्जिटमा छु भन्ने लागेछ । छ महिनापछि अष्ट्रेलियाबाट घर फर्किएका उनलाई अहिले आफ्नै मुलुकको विमानस्थल यति सफा र व्यवस्थित भएको थाहा रहेनछ ।

हो, यतिखेर त्रिभुवन अन्तर्राष्ट्रिय विमानस्थल पुग्ने जो कोहीलाई पनि यस्तै लाग्छ । भुइँ, चर्पी, स्नानकक्ष, भित्ताहरु र कुर्सीहरु सबै सफा छन् । सामानहरु यत्रतत्र छरिएका छैनन्, आ–आफ्ना स्थानमा मिलाएर राखिएका छन् । फोहर राख्ने बाकसहरुसमेत आकर्षक र सफा देखिन्छ । भित्र छिरेपछि मगमग बास्ना पनि आइरहेको हुन्छ ।  यात्रुहरु अचम्म मान्दै भनिरहेका हुन्छन्, ‘राम्रो ! सफा भएछ विमानस्थल ।’

अनलाईन खबरले पनि एकराज पाठकको त्यहि लेखलाई महत्वकासाथ आफ्नो पोर्टलमा राखेको छ ।

अष्ट्रेलियामा रहेर आठ बर्षसम्म कुनैपनि क्षेत्रमा काम गरेको मान्छेले यो दक्षता हासिल गर्छ नै जसरी खेमले नेपालको विमानस्थललाई यसरी परीवर्तन गर्न सके । तर के नेपाल सरकारले यो सरसफाइलाई निरन्तरता दिन सक्छ त? के खेमले छोडेको चार सातापछी पनि विमानस्थलको यही रुप कायम रहन्छ त?

नेपाल सरकारले गर्न सक्दैन भन्ने प्रश्न हुदै होइन । सरकारले चहनु हो भने जे पनि गर्न सक्छ । तर सरकारका कर्मचारीहरुको काम गर्ने शैली र भ्रष्टचारमा जकडिएको कर्मचारीतन्त्र हेर्दा यो प्रश्न गर्ने प्रसस्तै ठाँउहरु छन । सबैले नेपालको विमानस्थललाई यही रुपमा हेर्न चाहेको भएपनि  दक्ष र लगनशिल जनशक्तिको अभाव, राजनीतिक हस्तक्षेप, अस्थिर सरकार लगायतका यावत कारणहरुले यो कार्यले निरन्तरता पाउन सक्ने संभावना निकै कम छ । गैर आवाशीय नेपाली संघले सक्छ भने रुटिन बेसिसमा संसारभरबाट दक्ष नेपाली क्लिनिङ व्यावसायीहरुको व्यवस्थापन गरिदिए नेपालको पर्यटन विस्तारमा पक्कै राम्रो र प्रभावकारी कदम रहने छ । १ जना दक्ष क्लिनिङ व्यावसायीले  कमसेकम बर्षमा १ महिना समय दिने हो भने १२ जनाले बर्षभर प्रत्यक्ष निगरानी गर्न सक्छन । दुई देखि ३ बर्षमा प्रविधि र शिपलाई पुर्णरुपमा नेपाली कामदारलाई हस्तान्तरण गरेर सिह दरवार लगायतका अन्य ठाँउहरुमा पनि विस्तार गर्न सकिन्छ ।