अष्ट्रेलियाको कडा जैबिक कानुनले अष्ट्रेलिया कृषि तथा पर्यटन उद्योग तथा पर्यावरणमा नकारात्मक असर पार्ने निश्चित खाना, बोटविरुवा तथा मासुजन्य बस्तुहरु अष्ट्रेलिया ल्याउन निषेध गरेको छ । यही बर्षको अप्रिलमा लागु भएको एक कानुनका अनुसार अध्यागमनका कर्मचारीले यस्ता बस्तुहरु आफुसँग रहेको नखुलाउने जो कोहीको भिषा खारेज गर्न वा अवधी छोट्याउन सक्ने अधिकारको व्यवस्था गरेको छ । 

के के खाना अष्ट्रेलिया ल्याउन पाइन्छ र के के पाइदैन त?

अष्ट्रेलियाको एयरपोर्टहरुमा अवतरण हुनुपुर्व हवाइजहाजका कर्मचारीले एउटा फारम दिन्छन, त्यसमार्फत आफुले ल्याएका खानाहरुबारे अष्ट्रेलिया जैविक सुरक्षा अधिकारीलाई आफुले ल्याएको खानेकुराको बारेमा जानकारी गराउनुपर्ने हुन्छ । फारममा ल्याउन निषेध गरिएको कुनै खानेकुरा भए जैविक सुरक्षा अधिकारीले तपाईको झोला अनुगमन गर्छन । तलका कुराहरु अष्ट्रेलिया ल्याउन निषेध नगरिएकाले तपाईको झोलामा ती बस्तु भएपनि निर्वाध रुपमा अष्ट्रेलिया प्रवेश गर्न पाउनु हुनेछ ।

 यदि तपाईको झोलामा कफी, बिस्कुटहरु, पाउरोटी, केक, चकलेट, म्यापल सिरप र तेलहरु रहेका छन भने यहाँले फारममा जानकारी गराइराख्नु पर्दैन ।

तर चियापत्ति, चामल वा भात, मरमसला, अचारहरु, गेडागुडी र दुघजन्य पदार्थहरु बोक्नुभएको छ भने जैविक सुरक्षा अधिकारीलाई जानकारी गराउनै पर्दछ ।

अौषधी 

आफुले खानेगरेका औषधीहरु अष्ट्रेलिया ल्याउन पाईन्छ तर डाक्टरको प्रिस्क्रिप्सन अनिवार्य रुपमा बोक्नु पर्दछ । तीन महिनाभन्दा बढी समयको लागी भने औषधी ल्याउन पाइन्न । यसरी आफुसँग भएको औषधीसमेत अष्ट्रेलियका एयसपोर्टमा रहेका अध्यागमनका कर्नचारीलाई जानकारी गराउनु पर्दछ । 

बोटबिरुवा, फुल तथा बिउबिजन

जिवित बोटबिरुवा अष्ट्रेलिया ल्याउन निषेध गरिएको छ । बिउबिजनको हकमा तपाईले अध्याकमन कर्मचारीलाई जानकारी गराउनुपर्ने हुन्छ । उनीहरुले आवश्यक अनुगमन गरि ल्याउन मिल्ने बिउबिजन भए ल्याउन दिन्छन । 

मिठाइजन्य बस्तुहरु

आफुसँग कुनैपनि प्रकारका मिठाइजन्य पदार्थ रहेको भए आष्ट्रेलियन अध्यागमनले जानकारी गराउन भन्छ । साथै फुलहरु, सुकाका फलफुलहरु तथा इन्डियन मिठाइहरु ल्याउन निषेध गरेको छ ।

निषेध गरिएका बस्तुहरु ल्याउदा के हुन्छ?

निषेध गरिएका सामानहरु तपाईले हवाइजहाजबाट ओर्लने समयमा जहाजका कर्मचारीले दिइको ‘Incoming Passanger Card’ मार्फत अध्यागमनका कर्मचारीलाई जानकारी गराउनुपर्ने हुन्छ । ‘Incoming Passanger Card’ कानुनी कागजात हो । तपाईले आफुसँग छ भनी जानकारी गराएका बस्तुहरु अष्ट्रेलियाको कृषि तथा जलश्रोत विभागका कर्मचारीले चेकजाँच गर्छन र कानुनी रुपमा अष्ट्रेलिया लैजान नमिल्ने बस्तुहरु जफत गर्छन । माथी भनिएका सामाग्रीहरु यदि तपाईसँग छन भने तपाई आफैंले उपलब्ध गराइएको बिनमा फ्याल्नपनि सक्नुहुनेछ । 

निषेध गरिएका बस्तुबारे अध्यागमनलाई जानकारी नगराउदा के हुन्छ?

तपाईले ‘Incoming Passanger Card’ मार्फत जानकारी नै नगराएपनि अध्यागमनका कर्मचारीले तपाईको ब्यागको खानतलासी गर्न सक्ने कानुनी प्रवधान रहेको छ । उनीहरुले X-ray मेसिन वा तालिमप्राप्त कुकुरको सहायताले चेकगजाँच गर्न सक्नेछन । यदि यसरी चेकजाँचका क्रममा तपाईले निषेध गरिएका सामाग्रीबारे जानकारी नगरेको देखिएमा देहायका सजाय हुन सक्छन;

• तपाईलाई पक्राउ गर्न सक्छन
• तपाईको भिषा अवधी घटाउन सक्छन 
• तपाईको भिषा रद्द गरेर फिर्ता पठाउन सक्छन । यसो भएमा तपाई आगामी तीन बर्षसम्म अष्ट्रेलिया आउन स्वत: अयोग्य हुनुहुनेछ । 
• तपाईलाई जरिवाना गराउन सक्छन
• तपाईलाई अष्ट्रेलियन डलर ४ लाख बीस हजारसम्म जरिवाना र १० बर्षसम्मको जेलसजाय सम्मको सजाय हुनसक्छ