८ मे २०१७, सिड्नी- गैर आवाशिय नेपाली संघ राज्य समिति क्विन्सल्याण्ड संयोजक अभिमानसिंह बस्नेतले आगामी कार्यकालका लागी गैर आवाशिय नेपाली संघ अष्ट्रेलियाको उम्मेद्वारी घोषणा गरेका छन् ।

म सम्पूर्ण सदस्य महानुभावहरु माझ एनआएनए अष्ट्रेलियाको अध्यक्ष पद (सन् २०१७–२०१९) को लागि आफ्नो उम्मेदवारी सगर्व घोषणा गर्दछु । मलाई थाहा छ, हामीसंग अझै झण्डै २ महिनाको अवधि बाँकी छ र यो हतार जस्तो पनि देखिन्छ । झण्डै ९ हजारको सख्यामा रहेका हाम्रा सदस्यहरुका विच आफ्नो एजेन्डालाई छलफल गराउनु र उनीहरुबाट उठेका प्रश्नको जवाफ दिनु र सवैको सुझावलाई मनन गर्दै कार्यनीति वनाएर अघि बढ्नुपर्ने भएकोले सायदै यो हतारको विषय पनि मान्न नमिल्ला ।
अध्यक्षको पद आफैंमा ज्यादै महत्वपूर्ण र गौरबशाली पद हो । अतः समुदायका सदस्यहरुसंगको छलफललाई जति घनीभूत बनाउन सकियो, त्यसको प्रतिफल समेत सकारात्मक आउने कुरामा मलाई आशा छ । जुन एनआरएनएको विकासका लागि लागू गर्न सकियोस् । बिगतमा मैले निभाएको एससीसी कोअर्डिनेटरको २ वर्षको कार्यकालमा हाम्रा कयौं एजेन्डाहरुलाई हामीले समाधान गरेका छौं । आगामि कार्यकालका लागि मैले केही थप नयाँ एजेन्डाहरु समेत अगाडि सारेको छु ।